ආදර සබඳතාවක ආරම්භයේදී ඇතිවන දැඩි ලිංගික ආශාවන් (Erotic desire) සහ ආකර්ෂණය කාලයත් සමඟ ක්‍රමයෙන් හීන වී යාම අද බොහෝ යුවළවල් මුහුණ දෙන ප්‍රධාන ගැටලුවක්.
"අපි අතරේ ආදරය තියෙනවා, ඒත් ඉස්සර තිබුණු ඒ උද්යෝගය දැන් නැහැ"
මේ කතාව පවුල් උපදේශන (Couples counseling) සැසිවලදී අපට නිතර අසන්නට ලැබෙන මැසිවිල්ලක්.
සැබවින්ම ලිංගිකත්වය උද්වේගකර සහ අමතක නොවන අත්දැකීමක් බවට පත් කරන්නේ කුමක් මගින් ද?
සායනික මනෝවිද්‍යාවට අනුව, ඒක හුදෙක් ශාරීරික ක්‍රියාවලියක් පමණක් නෙමෙයි, අපගේ මනස, පරිකල්පනය සහ චිත්තවේගීය සමීපතාවය (Emotional intimacy) මත පදනම් වෙච්ච අතිශය සංකීර්ණ ක්‍රියාවලියක්. Loveology Hub වෙතින් ගෙන එන මෙම ලිපිය, ලිංගික ආශාවන්හි මනෝවිද්‍යාව සහ සබඳතාවක සමීපතාවය සදාකාලික කරගන්නා ආකාරය පිළිබඳව ඔබට තේරැම් කරාවි.
ආදරය සහ ආශාව අතර ඇති මනෝවිද්‍යාත්මක ගැටුම
මනෝවිද්‍යාඥයින් පෙන්වා දෙන විදිහට, ආදරය සහ ආශාව කියන්නේ අපේ මනස තුළ එකිනෙකට පරස්පර අවශ්‍යතාවන් දෙකක් නියෝජනය කරන සංකල්ප දෙකක්
ආදරය (Love): ආදරය සැමවිටම සොයන්නේ ආරක්ෂාව, හුරුපුරුදු බව සහ විශ්වාසයයි.
ආශාව (Desire): නමුත් ලිංගික ආශාවන් (Erotic desire) පෝෂණය වන්නේ අලුත් බව (Novelty), අභිරහස් බව, ත්‍රාසය සහ කුතුහලය මත.
විවාහ වී කල් ගතවන විට දෙදෙනාට දෙදෙනා ඉතා හොඳින් හුරුපුරුදු වේ. එහිදී ආදරය වර්ධනය වුවත් ආශාවට අවශ්‍ය 'කුතුහලය' අතුරුදහන් වී යනවා. ආශාවන් හීන වීමට ප්‍රධානතම හේතුව මේකයි
අමතක නොවන සමීපතාවයක් නිර්මාණය කරන ප්‍රධාන සාධක
ඔබේ සබඳතාවයේ සමීපතාවය යළි අවදි කිරීමට නම්, පහත මනෝවිද්‍යාත්මක සාධක කෙරෙහි අවධානය යොමු කිරීම වැදගත් වේවි.
1. පූර්ණ මානසික පැවැත්ම (Mindfulness and Presence)
අමතක නොවන ලිංගික අත්දැකීමක ප්‍රධානතම රහස තමයි 'සිහියෙන් යුතුව සමීප වීම' (Mindful Intimacy). දෛනික ජීවිතයේ ආතතිය, රැකියාවේ ගැටලු හෝ දරුවන්ගේ වැඩකටයුතු මනසේ තබාගෙන සමීපතාවය රසවිඳිය නොහැක. සහකරු හෝ සහකාරිය සමඟ සිටින මොහොතේ, වෙනත් කිසිදු සිතිවිල්ලකට බාධා කිරීමට ඉඩ නොදී පූර්ණ වශයෙන් එම මොහොතේ ජීවත් වීම (Being present) මෙහිදී අතිශය වැදගත්.
.
2. පරිකල්පනය සහ ආරක්ෂිත සන්නිවේදනය (Erotic Imagination)
අපගේ ප්‍රධානතම ලිංගික අවයවය වන්නේ අපගේ මොළයයි. අමතක නොවන සමීපතාවයක් නිර්මාණය වන්නේ ශරීර ස්පර්ශයට පෙර මනස තුළ ඇතිවන පරිකල්පනය (Fantasies) හරහා. තම සහකරු සමඟ කිසිදු විනිශ්චයකට ලක්වීමේ බියකින් තොරව සිය ආශාවන් සහ මනඃකල්පිතයන් විවෘතව කතා කිරීමට හැකි පරිසරයක් නිර්මාණය කරගැනීම ඉතා වැදගත් වේවි.
3. දෛනික චර්යාවෙන් මිදීම (Breaking the Routine)
ලිංගිකත්වය යනු නිදන කාමරයට සහ රාත්‍රියට පමණක් සීමා වූ 'රාජකාරියක්' බවට පත්වීමට ඉඩ නොදෙන්න. පෙර සූදානම (Foreplay) ආරම්භ විය යුත්තේ නිදන කාමරයෙන් නෙමෙයි, දහවල් කාලයේ යවන ආදරණීය කෙටි පණිවිඩයකින් හෝ මෘදු ස්පර්ශයකින් වෙන්න පුලුවන්. ස්ථානය සහ වේලාව වෙනස් කිරීම මගින් මොළයට අවශ්‍ය 'අලුත් බව' (Novelty) ලබා දිය හැකිය.
කාමර සගයන්ගෙන් පෙම්වතුන් බවට
වසර පහක විවාහ ජීවිතයක් ගත කළ යුවළක් අපගේ උපදේශන මධ්‍යස්ථානය වෙත පැමිණියේ, ඔවුන් දෙදෙනා දැන් එකම නිවසේ ජීවත්වන හුදු 'කාමර සගයන්' (Roommates) දෙදෙනෙකු බවට පත්ව ඇති බව පවසමින්. ආදරය තිබුණද, ඔවුන් අතර කිසිදු ලිංගික ආකර්ෂණයක් තිබුනේ නෑ.
උපදේශන සැසි හරහා ඔවුන්ගේ දෛනික චර්යාව විශ්ලේෂණය කිරීමේදී පෙනී ගියේ, ඔවුන්ගේ ජීවිතය අතිශය යාන්ත්‍රික වී ඇති බව.. අප ඔවුන්ට ලබා දුන් ප්‍රධාන උපදෙස වුනේ, දරුවන් සහ රාජකාරි වගකීම්වලින් මිදී සතියකට එක් දිනක් හෝ ඔවුන් දෙදෙනාට පමණක් වෙන් වූ කාලයක් (Date night) නිර්මාණය කරගන්නා ලෙසයි. එහිදී ලිංගිකව එක්වීම අනිවාර්ය නොකළ අතර, එකිනෙකාගේ දෑස් දෙස බලා කතා කිරීම, මෘදු ස්පර්ශය සහ අලුත් දේවල් අත්හදා බැලීමට (උදා: කෙටි නිවාඩුවක් සඳහා වෙනත් පරිසරයකට යාම) ඔවුන්ව යොමු කෙරුණි.
මාස කිහිපයකට පසු, ඔවුන් අතර නැති වී ගිය කුතුහලය සහ ආශාව ස්වාභාවිකවම යළි අවදි වන්නට විය. ඔවුන් වටහා ගත්තේ, ආශාව යනු ඉබේ පහළ වන දෙයක් නොව, දැනුවත්ව නිර්මාණය කරගත යුතු කලාවක් බවයි.
ලිංගික ආශාවන් (Erotic desire) යනු ඔබේ සබඳතාවයේ ජීවමාන බව පෙන්වන හෘද ස්පන්දනය වගේ.
ඒක පවත්වා ගැනීම සඳහා විශ්වාසය, විවෘත සන්නිවේදනය සහ දෛනික ඒකාකාරී බවින් මිදීම අත්‍යවශ්‍යයි. කාලයත් සමඟ ඔබේ සබඳතාවයේ මෙම සමීපතාවය ගිලිහී යමින් පවතින බව දැනෙනවා නම් නම්, එය සබඳතාවයේ අවසානය නොවේ.
සුදුසුකම් ලත් පවුල් උපදේශකවරයෙකුගේ (Couples Counselor) සහය ලබා ගැනීම හරහා, අහිමි වූ ඒ සුන්දර සමීපතාවය වඩාත් අර්ථවත් ලෙස යළි ගොඩනඟා ගැනීමට ඔබට අනිවාර්යයෙන්ම හැකියාව ඇත.
"Loveology Hub හි නවතම ලිපි, ඔබගේ WhatsApp අංකයටම ගෙන්වා ගන්න! මෙතැන Click කරන්න" (Click here to connect)
